‘Ka nu khaw’nge i awm?’, ‘Hmangaihna Pasalțha’, ‘Di loh di’, ‘Sensiari’ film leh adangte khan a hun laiin Zoram dung leh vang a fang chhuak hneh hle \hin a nih kha. A changtute pawh kan hmelhriat viau a, kan tuipui viau thin.

Hun leh ni te a lo vei a, kum 2000 A.D a lo herchhuah meuh chuan Mizoram film industry chuan nasa takin hma a lo sawn a, rahbi thar min kaipuitu zinga thawh hlawk em em, ‘House No. 109’ leh ‘Mission’ te atanga kan hmelhriat C. Lalhmangaiha hi tu nge a nih i lo belchiang dawn teh ang.

Lunglei tlangval Mapuia hi April ni 27, 1974 khan Hnahthialah a piang a, a nu C. Biaktluangi niin a pa chu J.T Eyavi (L) a ni. Tunah hian a nu, a nupui leh a fanu te pahnih nen Electric veng, Lungleiah an khawsa mek a ni. Kum 9 mi a nihin kum 1983 khan Delhi lama a chhungte bulah lehkha zirin a awm tan a, chutah chuan a tleirawl hun chhung zawng zawng hmang ralin kum 1995 khan Mizoramah a lo kir leh a, J. Buana College, Lunglei atangin B.A (Hons) a zo a, a hnuah Hindi B.A a zo leh bawk.

A naupan lai atangin film leh cinema lamah a tui em em a, a tui dan erawh a en lamah ngawr ngawr a ni thung. Delhi bul lawk Noida Film City-a film star lar deuhin shooting an neih dawn chuan class tlanbo thak thakin an en thin a, chu zawng chu videography lama a zir leh a hnuhma neih chu a ni! Ama sawi danin inzir tum lam aiin mi lar hmuh chak hrim hrim vang a ni zawk mah!

Kum 2002-ah Burma sumdawng hnen atangin second hand video camera a lei ve a, installment in a man pawh a pe nghe nghe. Chu chu a taka video camera duhthala a khawih hmasak ber chu a ni mai a, thla thum hnu lekah film siam tumin hma an la ta a ni.

Video Camera a neih atanga thla thum hnu lekah an thianho pathum hmalaknain film siam zai an rel ta a, pawisa pawh Rs. 500/- theuh bak thawh tur an nei lo a, tichuan Rs. 1500/- nei chung chuan a film hmasa ber ni ta House No. 109 chu an shoot tan ta a ni. A tirah chuan film puitling leh lar hluai tur ang pawhin an ruahman lo, a laklawhah an tui chho ta zel a, a hunlaia Lunglei Addtional S.P Pu Lalthanmawia hnenah, “Police lam hmingthat deuhna tur film kan siam dawn a, in hmanruate hi min hawhtir thei ang em?” tiin an bel bul ta chawt mai a. Ani’n Aizawl lama official te dilsakin tluang takin an indawr thei ta a, a film-ah pawh khan police tak tak eng emaw zat an chang ve nghe nghe! |hianthate leh hmelhriatte puihnain tluang takin an zo thei a, cheng nuai khat pawh an seng tling lo a ni.

Mapuia Chawngthu hian ama pualin film puitling pathum a siam tawh a, chu’ngte chu House No. 109 (2002), Mission (2003) leh Khawnglung Run (2012) te an ni. Doordarshan Kendra tan short film 2 leh documentary film pakhat siam tawhin sorkar department hrang hrang tan short film 3 vel a siam tawh bawk. Heng bakah hian kohhran thalai lamin an siam leh mi dang produce eng emaw zatah a tel ve bawk. Tunah hian Siama (SVP) nen thawk dunin ‘Nunna Thar’ film siam tumin hma an la mek.

A film siam, a produce loh te

1.       Love Bethel

2.      Lungdumtu

3.      Kantu Express (KTP, Chhinga Veng)

4.      Guardian Angel (KTP, Bawngkawn Chhimveng)

Music video hi tun thlengin 300 chuang a siam tawh a, C. Lalruatkima “Ka rawn pan che” tih chu a hmasa ber niin Pensy video ‘Fak zel che ka nuam’ tih kha a pahnihna a ni thung. A music video siam zingah hautak deuh deuh a awm nual a, chu’ng zingah chuan Ramhlun North YMA zaipawl music video ‘AIDS’ kha a hautak berte zinga mi a ni a, cheng nuai chuang fe sengin a film siam hmasak ber ai pawhin an seng hnem zawk a nih chu! A hautak zual zingah Mama Chhangte ‘Tleitir Hmeltha – 2’ te, Lunglei Bazar veng YMA zaipawl ‘German Rallian’ te, F. Laldinmawii khawhar hla leh tuna a khawih mek D.J-i music video thar te an tel.

Videography lama tui, a bikin zirlaite’n an bel nasa em em a, society tana a thawh ve theih nia a ngaih avangin lawm takin a lo dawngsawng thin. Chutiang chuan kum 2012 vel atang khan Hyderabad University, Mizoram University leh hmun dang atang te pawhin mass communication lam zirte tan internship program a kalpui thin a, pawisa pawh phut lem loin kumtin mi pahnih pathum velin a hnuaiah hian an zir thin.

Lunglei tlangval thawkrim Mapuia hi Mizoram atang chuan a thleng sang ber pawl a ni awm e. Kum 2012 a a film siam ‘Khawnglung Run’ khan Regional Censorship Board, Film Division, Guwahati atangin Censorship Certificate a nei thlap a. Kum 2013-a International Film Festival, Goa a neihah North East section opening nan an hmang bawk. A hnu lawk 2014 a North East Vibrant (Film Festival), Delhi-a neihah opening nan an hmang bawk a. Film festival hrang hrang 22 laiah ‘Khawnglung run’ hian screening a lo paltlang tawh a ni.

Tin, Khawnglung Run film vek hi Harvard University, USA, Singapore University leh Mizoram University-ah te teaching aid atan hman a ni tawh bawk.

Mapuia hian video a siam dawn reng rengin thil thar chin chhuah hram hram a tum thin a, taima tak leh inthlahdah loa beite tan chuan hlawhtlinna kawng a awm bawk niin a sawi. Mizo film industry a la lian lo a, music video te pawh a hralhna lam (market) a la that lutuk loh rualin tih tak zeta beih tum tan chuan hlawhtlinna kawng a awm a ni tih hi Mapuia atang hian a lang chiang hle a ni.

LABELS: TODAY HERO