Kum 1857, September 13-a piang Milton-a hian unaunu pakhat a nei a, vanduaithlak takin kum 9 mi a nihin a unaunu chuan a thihsan a, a a nu leh a pa nen chauh an ni ta a. An chhungkua hi a pa hnathawhna avanga an insawn fo va, kum 13 a tlin meuh chuan school hrang hrang parukah a lut hman hial a. Lehkha thiam thei hle mah se, an insawn reng avangin Milton-a chuan harsatna tam tak a tawh phah a, a nu chuan, pawl a zir zawh hnuin sikul chawlhsana kut hnathawh lama eizawnna dap turin a duh tak zawk a.

Lehkha chhutna khawl (printing press)-ah a thawk a, German-English newspaper an chhuah thin. A hnaah a tui hlawl lo. Ni khat phei chu khawlah a lukhum a titla a, an hotupa chuan thinrim engphiarin a hau a, hrehawm a ti hle. 

Heta kum hnih zet a thawh hnuah a nu chuan kum 1872 khan Lancaster confectionary shop-ah, Joseph Royer hnuaiah hna thawh tur a hmuhsak hlau va, hetah hian theihtawpa thawkin, chithlum siam dan hrang hrang a zir chho zel a; chutih laiin a pa chuan chu chu ‘hmeichhe hna’ tiin a tuipui lo hle thung. Chuti chung chuan, a tuina zawng tak a lo nih si avangin kum 1876 khan a chhungte pawisa pukin Philadelphia khawpuiah chithlum dawr hawng turin a lut ta rawih mai. 

Phur tak chungin sumdawnna a tan chho va, nimahsela, hlawhtlinna hi mi vannei chungchuangte tan lo chuan chuti maia awlsam hmuh theih a lo ni lo! A hlawhchham chiang hle a, kum 6 a liam hnuah phei chuan a dawr a khar ta hial zawk a ni. Mahse, mi hlawhtling kan tihte hi mi beidawng ngai lo an lo ni, a beidawng duh lo. Colorado-a Denver-ah, a pa awmna lamah a insawn phei a, chutah pawh chuan chithlum siamnaah bawk thawkin bawnghnute, chini leh vanilla hmanga chithlum tui tak tak siam dan a zir chhuak ta a, a hlim kher mai. Hemi hnuah beiseina nen New York khawpuiah sumdawnna bul tan tumin a kal leh a, a la hlawhchham ta fo mai! Chu chu mi tam tak beidawnna hun a ni tawh.

Kum 1886-ah chuan kum 28 lai a lo ni ve ta a, kum 14 chuang zet chu sumdawnna a buaipui tawh a, hlawhtlin tik ni reng a nei lo. Mi tam tak, mi hlawhtling lote paltlang theih loh hun (stage) chu he hun hi a ni. Milton-a erawh chuan, mi hlawhchham mai mah ni se, a tum chu a phet lo chiang kher mai. Lancaster khaw lam a pan a, Denver khuaa chithlum siam dan a zir chu hmang tangkaiin, caramel (chithlum chi khat) siamna company, Lancaster Caramel Company chu a din leh ta a ni. Company chu tluang taka a kal a beisei em em laiin a hma ang bawkin, hlawkna khawp siam chhuahna tur hmanrua a nei ta lo va. Nimahsela, vanneihnain a rawn um ve ta. America tlawha British mi lo zin chuan a thil siam chu a lo tem fuh hlauh mai. A duh zawng tak a nih avangin an ram lama zawrh chhawn a duh ta a, hei hi Milton-a hlawhtlin intanna a ni ta. He English pa hian tam tham tak a order a, mahse, Milton-a neih sum leh hmanruain a daih awkawng lo mai. A pung awmin bank-ah pawisa a puk a, hmanrua a lei a, a thil siam chhuah pawh a lo tam ta deuh deuh a, a company chu a thang chho ta zawt zawt mai a ni.

A sumdawnnaah hian Lancaster khua hi a pawimawhin a remchang hle. Chithlum siam nan bawnghnute sawr chawp ngat a hmang thei a, electric siam chhuahna bulah dawr a siam a, chumi hmang chuan a khawl a hmang tangkai thei ta zel a. Chu mai ni lovin, Lancaster khua chu rel kawngin a tan tlang a, rel-ah chuan a thil siamchhuahte a zuar nghal thei zel bawk a, a remchang takzet.

Kum 1890 chhovah chuan Lancaster Caramel Company chu a rawn lian chho ta hle! Factory pahnih neiin hnathawktu pawh mi 1300 lai a chhawr ta hial a, Lancaster khuaa mi hausa berte zinga mi a lo ni ta. Kum 1893-ah Columbian Exposition-ah Milton-a chu a tel a, chutah chuan German company pakhat chuan chocolate siam dan an lo entir a. Chocolate siam lama inleh a duh tak avangin, hun rei tak a inngaihtuah hnuah, risk la tak meuh meuhvin Lancaster Caramel Company chu US dollar maktaduai khatin a hralh a, chumi hmang chuan chocolate siamna hmanrua leh khawl pawimawhte a lei a, ‘Hershey Chocolate Company’ a din chho leh ta a, a risk sual ta lo kumkhua a nih hi.

A tir takah chuan he chocolate siamna khawl atang hian caramel chithluma telh tur chauh an siam thin a, mahse, hun a kal zel a, chocolate siam lam a hawi ta zawk a. Tichuan, April ni 17, 1895 khan Milton S. Hershey chuan vawiin thlenga kan hriat lar Hershey chocolate chu a vawi khat na atan a zuar chhuak ve ta a ni. 

Kum 1900-ah molded milk chocolate bar an tih, bawnghnute hmanga chocolate tui tak siam dan a rawn hmu chhuak a, hei pawh hi vawiin thlenga Hershey’s larpuitu a ni.  

Milton Hershey hi mi taima leh tumruh tak a nih bakah mi khawngaihna ngah em em mai a ni a; Hershey’s company-ah chuan mi nawlpuiin an thil siamte an lei theih nan, chocolate chi tam tak siam lovin chi hnih/thum vel a siam a, a senso leh a hralhna man a tihniam hle. 

Tleirawl tê, mahnia eizawnna indap chawp, mi dawra thawk kual mai mai chuan mahniin dawr a hawng a, vawi eng emaw zat a hlawhchhampui a ni. Nimahsela, a beidawn duh lohna chuan a tawp a tawpah hmingthanna leh hlawhtlinna a rawn thlen a, ‘Hershey’ tih hming ringawt pawhin mi tam tak a tihahdam sawng sawng tawh a ni ber. 

A hausak hnu pawhin mi harsa leh hnuaihnung zawkte a tanpui nasa a, charity lamah a inhmang nasa hle. Kum 1909 khan ‘Hershey Industrial School’ dinin mipa naupang nu leh pa nei lo tan zirna hmun tha tak a siamsak a; kum 1918-ah a thil neih tam zawk chu Milton Hershey School Trust tan a dah a; MHST hian Hershey Entertainment and Resorts Company chu 100% a thunun a, Hotel Hershey leh Hersheypark te pawh a enkawl bawk. A sikul din chu kum 1951 khan Milton Hershey School tia thlak a ni ta a. Kum 1935 khan MS Hershey Foundation chu dinin, zirna lampangah tanpuina hna a thawk thin. Hei bakah hian Hershey Museum, Hershey Garden, Hershey Theatre, Hershey Community Archives leh Hershey Medical Centre te pawh din chhoh zel a ni bawk.

Milton Hershey School hi acre 2640 zeta zauvah a inbun a, thawktu mi 130 zet awmin, zirlai naupang 2000 chuang zet chuan a thlawnin lehkha an zir mek a ni.

-----------------------------------------------

Titanic atanga chhanchhuahna mak!

Kum 1912 khan Hershey leh a chi leh kuangte chuan British nawmchenna lawnglian RMS Titanic chu an book a. Mahse, chawp leh chilh takin an sumdawnna thil avangin an reservation chu an cancel leh ta a ni. Kan hriat theuh angin titanic lawnglian chu tuifinriat tuipuiah a pil ta a, a mi chuang mi 1000 zet maiin an thihpui nghe nghe  a nih kha. Hemi hnu hian New York pan nan German nawmchen lawnglian SS Amerika hmangin an haw ta a ni.

Indopui-II naah

Hershey Chocolate chuan indopui pahnihna chhung zawng khan US sipaite hnenah chocolate an supply char char a; an chocolate supply-te hi Ration D Bars leh Tropical Chocolate Bars te a ni. Kum 1940 atanga kum 1945 chhungin heng chocolate chi hnihte hi tluklehdingawn thum chuang zet chu sipaite hnenah an supply a ni.

International Chocolate Day

Milton-a pian ni, September ni 13 hi International Chocolate Day-ah puan a ni a, USA-a National Confectioners Association chuan he ni hi kum tin an lawm ziah thin. 

-------------------------------------------------

Milton Snavely Hershey hi September ni 13, 1857 khan USA-a Derry Township, Pennsylvania-ah a piang a, a nu chu Veronica Snavely Hershey niin a pa chu Henry Hershey a ni. Hershey Foods Corporation a din a, Chocolate a siam thin avangin ‘The Chocolate King’ tiin hminglem an vuah hial. A nupui Catherine Sweeney nen hian May ni 25, 1898 khan an innei. Catherine hi a caramel siam order-tu pakhat a ni. A nupui hian fa neihsak lovin kum 1915 khan a thihsan a, nupui a nei zui ta lo. Amah pawh October ni 13, 1945 khan kum 88 mi niin Pneumonia avangin a thi.