(Pu Bawlliana, Mission Veng hi Pastor hmasate zinga mi Pastor Bankuaia leh Pi Khuangkungi te fapa a ni a, District Council hun lai pawha Development Officer pawh lo ni tawh, Supply Department atanga Deputy Director-a pension, mi dik rum rut, corruption haw tak, sorkar hna a thawh lai pawha a rinawmzia tlang hriat, a pension hnuah pawh state sorkar hmasa ber Chief Minister Pu Laldenga'n sorkar hnathawk inthlahdah leh corrupt-te check tura Officer on Special Duty (OSD) atana a sawm chhuah ngat, Pu Denga sorkar tawp hnuah pawh Pu Lal Thanhawla pawhin a la sawm zui zel, kan ram tana mi hlu tak a ni. Kum 1949-1950 khan CYMA Asst. Secretary a ni a, kum 1951-1952 khan General Secretary a ni bawk. Chutiang mi chu May ni 25, 2018 (12:15 am) khan a chenna in, Mission Vengah kan chan ta a, a thih ni chawhnu dar 1:00-ah vui a ni.

April ni 24, 1942 khan Upa Sawithanga, Thakthing Veng-a mi nen hian Major AG McCall, ICS, Bawrhsap khan min interview a. Kei chu heti hian min ti a, "I pa Pastor ka hria a, a bialah han kal la, Japan spy an kal leh kal loh i han zawt ang a, an lo kal vaih chuan rang takin Aizawl rawn kirin min hrilh dawn nia," tiin.

Ka kalna tur khua a sawi khawchhak Tuipui kam khuaah te, Tiau lui khuaah te ka nau nen kan han kal a. Tumahin Japan sipai kal thu an sawi ta lo a, Bawrhsap McCall-a hnenah ka hrilh ta a. Tihian min ti ta a: "Khuangphah leh Hnahlanah han kal la, labour 300 leh commander pathum leh Hnahlan khaw mi CL Khama nen. Tichuan, tunaah hian Japan sipaiin Burma pumpui an la vek tawh a, British ralthuam an lak tel kan hlau a, a vaiin British General Wing-a te nen Mizoramah, Khuangphah-ah leh Hnahlan-ah kan rawn chhawp thla vek a. Ngawi rengin in kal ang a, chung ralthuamte chu... a bikin silai leh a mu leh bomb te chu Aizawl-ah in rawn phur thla vek dawn nia. I thei ang em chu chu?" min ti a. "Thei ang," ka ti a, mi 300 leh commander pathum leh CL Khama te chu hruaiin ngawi rengin Hnahlan leh Khuangphah chu ke hlira kalin kan thleng chho ta a ni.

Mi 300 phurah British ralthuamte chu kan tel ta vek a, an phur zo tawk a lo ni ta a. Chung ralthuam leh bomb-te nen chuan Aizawl kan lo thleng a, Boys ME School-ah (kan in chhak) dah tura min tih angin kan dah ta vek a. Chumi kan dah laia lo awm chu Bawrhsap leh General Wing-a te kha an ni a, an lawm kher mai.

Bawrhsap chuan, "Tangkapui kan 'recommend' ang che/ I duh ang em?" tiin min zawt a. Kei pek chuan, "A ngai lo, ka duty ka ti a ni mai," ka lo ti a. Min 'recommend' lovin Willis Jeep-in chi (salt), sipai tana thlawhtheihna hmanga an thlak ang chi, var deuh mai hi kan inah min rawn pektir ta a.

Bawrhsap office-ah chuan ka thawk ve ta a. Ka luh laia bawrhsap chu Major McCall a ni a, ani hi a lal ber a. Mizo lo thawkte chu Pu R. Buchhawna, assistant superintendent te; Pu Lianhnuna BA te; Pu Lalkailuia Sailo, Reiek lal fapa te an ni a, anniho kha head clerk an ni a. A hnu deuhah Pu Vandailova a rawn awm ve leh a. Kei kha clerk ka ni a.

Bawrhsapin ka clerk hna tur chu a siam a; sipaiho hlawh kha, chung lai chu Indopui Pahnihna hun lai kha a ni a, sipaiho hlawh, postal money order hmanga an chhungte an thawn lo chinfel kha a ni a. Bawrhsap kha superintendent of post office a ni bawk a. Money order, sipaiin an chhungte an rawn thawnte ni tina lo buaipui kha kan hna a ni a. Money order leh a pawisa a inmil em tih te kan lo en fel a.

Chung lai chuan bawrhsap kha a lal em em a, 'all in all' kha a ni tak meuh a, thuneihna tawp a nei a ni ber a. 'Administration' a khawih a, 'judiciary' a khawih bawk a. Thil dang pawh kha a kutah a awm vek a ni ber mai. Lal pawh a siam thei a, chu chuan a lalzia chu a sawifiah ang. Health lamah civil surgeon a awm a, chu chuan office hran a nei a. A bak chu office hran a awm lo. Chu pawh chu bawrhsap hnuaia mi tho a ni. Security te, education te pawh bawrhsap khan a khawih vek. 'Bawrhsap' tih hi vaiin 'bora saheb' an tih kan hriat atanga kan neih a ni.

Assistant superintendent chu 'sap tê' kan ti a, bawrhsap thachhang dawltu an ni. Mizo-ah chuan Pu Buchhawna kha a hmasa ber. 'Sap tê' kha Mizo thawh phakah chuan a sang ber a, 'sap tê'-ah pawh ACS, a sang deuh an awm leh. Head clerk atang te khan assistant superintendent-ah chuan an kai. Political assistant superintendent-ah Pu Sainghinga a awm a. Ani kha bawrhsap tu pawh rawn awm se bawrhsap viltu ber a nih avangin assistant superintendent pangngai ang hi a ni lo.

Indo vang khan additional superintendent an awm a, chu chu 'sap tê' chung an ni. Additional superintendent kha sipai lam mi an nih chuan captain atang te, major atang tein civil service-ah an lut thei a, chutiang chu an ni thin. Capt. Bowman te, Capt. Penn te kha sipai atanga civil service-a lut an ni.

Clerk-ah chuan head clerk an awm a, upper division leh lower division te an awm a, CI an awm leh, CC (circle chaprasi) an awm leh.

Police lam kha Superintendent of Police-in a ho a, chung lai chuan Khasi a ni a. Bawrhsap pisa thlang lam liam, agriculture directorate chhakah hian anni khan office an nei. Dahrawk kha an awm a, dahrawk pawh kha lal tak an ni. Ran dahrawk kha an awm bawk a, anni hian ran an enkawl a, ran chungah thu an nei a. Dawrpui-ah ran dahrawk chu a awm. PWD lam kha supervisor-in a ho a, SDO 'rank' a ni a, hei hi PWD-ah a lal ber. Chung lai chuan Paresh Babu kha supervisor chu a ni. Aizawla sorkar in sak chu a 'plan' vek a ni.

Chung lai chuan in tinin kum khatah Rs. 2 an chawi a. Sorkarin a awlte chu hmeithai te, chawmtu nei lote kha an ni a. Chhiah chu mipuiin an pe tha. CI kan ti mai a, circle interpreter kha an awm a, anni'n chhiah chu an khawn a, bawrhsap office-ah an rawn pe lut thin. Khaw tinah khawchhiar an awm a, leiman te an khawn a. An chhinchhiah vek a, chung chu an rawn pe lut thin a. Treasury-ah kan luhtir a, kan lo tifel thin a ni. Aizawl bikah chuan dawr tax, shop tax kha a awm a, a zat ka hre tawh lo, ka khawih lo a. A hma chuan khawpui awm man kha a awm bawk a, kum khatah Rs. 10 emaw an chawi thin. Hei hi McDonald-a hun atang khan tihtawp a ni a, chawi a ngai ta lo. Circle chaprasi kha an awm leh a, lehkha peah te an tang a, an tlan kual zung zung thin.

Mipuiin bawrhsap office kha engkimah an dawr a ni ber a, office dawrtu kha an tam ve thei khawp mai. Office file zawng zawngte kha English vekin kan ziak.

Office-ah 'discipline' a tha em em a, office hi a hun takah kan thleng a, ban hmain kan haw ngai lo. Hauh ngai an awm loh avangin bawrhsap pawhin mi a hau ngai lo. Vawi khat erawh chu min hau a, mahse, hau pawh a ni lo a... khawlchhut ka zir a, khawl ka chhu a, paper pakhat hi pawnah ka lo theh chhuak palh a, MacDonald-a khan min hmu a, "Waste paper busket-ah paih rawh," min ti a, ka paih ta a ni.

Corruption a awm lo a, corruption kha kan hre lo khawp mai. Corruption hi a hriat pawh kan hre ngai lo a ni ber. Ropui tak a ni. Mizo kan rinawm a, eiruk a awm ngai lo. Tin, eiruk kha a langsar em em dawn a, inman chhuah zung zung a ni ang.

Vawi khat erawh chu, 'corruption' tia sawi theih ve deuh chu a awm. Bawrhsap khan thla tin hian 'working day' hnuhnung berah Treasury kha a 'check' thin a. Podar pahnih an awm thin a. Kan aia senior-te khan bawrhsap kha an pui thin a, clerk kha min pun thin bawk. Vawi khat chu chutiang ti tur chuan Treasury-ah kan lut thla a, a vengtu Assam Rifles-te'n Treasury chu an han hawng a, bawrhsap ho chuan kan lut ta a. Stool-ah kan thu thliah a, pawisa dahna thingrem chu bawrhsap chuan a'n hawng a, a duh zat zat a rawn tham chhuak a, tichuan, clerk-te kha min sem a, kan chhiar thin a.

Kan chhiar zawng zawng kha kan hming nen bawrhsap chuan a ziak a, a han belhkhawm a. A 'total' leh thingrema awm zat tur a inmil em tih a en ta thin a ni. A inmil chuan 'a dik vek e' tiin lehkhabu lianah a ziak thin. Thla a lo thar a, chung pawisa chu hlawhah te, a hmanna turah kan hmang ta thin a ni. Tum khat chu cheng -in a kim lo tlat mai a, podar pahnih zinga pakhat kha a hna a tihhniamsak a, CI-ah a tlakthlaktir a ni. Chu chu corruption anga ngaih theih han sawi tur chu a ni mai.

Office kha kan buai thei khawp mai a, hna a tam a. Zun a chhuah chuan pindan atanga chhuah lawk a ngai a, chumi bak chu kan chhuak zen zen lo. Hna a tam a, a tam loh pawhin kan chhuak chuang lo. Kan zingah khan meizu mi pakhat a awm a, Dr. Thanliana pa, ka pa Thanga kha a ni a. Ani khan mei a zuk duh chang chuan pawn a chhuak lawk a, a va fawp sawk sawk thin a. Zing dar 9-ah kan tan a, tlai dar 4-ah te kan bang a. Mahse, thlasik lai leh nipui laiin office tan hun leh ban hun hi an tidanglam thin a.

Sawi tawh angin office-ah kan buai a, hna ngah tum leh ngah loh tum te kha chu a awm ve. Typist-te pawh an buai. Sapho khan khawlchhut kha an uluk em em a, Pu McDonald-a phei kha chuan 'coma' dahna te hi a uluk a, tihsual a duh lo khawp mai. Khawlchhut kha kei pawhin ka zir a, minute khatah thumal 80 te ka chhu thei.

Chung lai chuan sorkar hnathawk kha mipuiin kan ngaisang a, lal fate pawhin an ngaisang alawm. Nulate khan pasal atan pawh sorkar hnathawk kha an duh deuh em maw ni. Naupang lehkha zirte pawh khan kamding nih an tum a, German leh Japan ral do lai kha chuan high school leh college naupang, zir tawh lote kha sipai lamah an lut a, a zir lai lut te pawh an awm a. Brig. T. Sailo kha kan aiin kum hnihin a upa a, ani pawh kha zir zawm lovin sipaiah a lut a nih kha.

Sorkar hnathawkte kha lehkhathiam an ni a, lehkhathiam kha kan ngaisang em em a. Tin, pawisa hlawh theihna a ni a, chung lai chuan pawisa hmuhna hi a vang em em a, sorkar hnathawkte kha chu thla bi hlawh la an ni a. Hna dang chu zirtirtu hna kha a awm a; kei chuan ka hlawh lak hmasak ber khan Rs. 14 ka la a, zirtirtute kha chuan thla khatah Rs. 5 te an hlawh tlat a ni. Chuvangin sorkar hnathawkte kha ngaihsan loh theih pawh an ni lo. Sorkar hnathawkte kha chu hla te pawh an phuahsak a, CI an phuahna te pawh a awm hi.

British hun lai khan sap bawrhsap kha pali ka hrawn a; Major AG Mc Call, ICS (1931 atanga 1943), ARH MacDonald, ICS (1943 atanga 1947), Capt. DA Penn (1946 atanga 1947) leh LL Peters, ACS (1947 atanga 1949) te hnuaiah khan ka thawk a ni.

An pali khan hna an thawk tha ka ti a, an fakawm. Sapho khan Mizote hi min hmangaih taktakin ka hria. Capt. DA Penn leh LL Peters te kha bawrhsap tak tak lo deuh an ni a, indo lai a nih avanga bawrhsap hna rawn thawk an ni a, bawrhsap 'charge' rawn la an ni.

McCall-a kha mithiam a ni a, Oxford atanga graduate a ni awm e. Mi inzir mi a ni. Keini awm hnua sap rawn kalte kha ICS tharlam deuh hlek an ni a. McCall-a kha chu British Army-ah major a lo nih thin avangin sap sipai khan an ngaisang a, sap sipai rawn lut zawng zawng khan a hming an lam ri. Kan lalte pawh kha kokhawmin Japan leh German ral do turin Lammual-ah hian thu a tiamtir a ni.

Tunlaia kan buaipui - Tuikuk leh Chakma chungchang te kha a vei a, Chakma khuaa ka kal hmasa ber pawh kha McCall-a'n min tirh vanga kal kha ka ni a. A lehkhabu - "The Lushai District Cover" te kha lei tur la awm tak maw? Kha lehkhabu kha ka luh ve hmaa a ziah a ni a, lehkhabu tha tak a ni. Lehkhabu dang pawh tha tak tak a ziak a.

In sak te kha, kawng a hnaih leh hnaih loh a enfiah thin a.

Capt. DA Penn kha Lunglei SDO a ni thin a, indo laia rawn awm a ni a. Aizawlah a awm rei lo. LL Peters kha mingo a ni na a, ACS a ni a. Fa an nei lo a, Indian citizenship a nei. A pension hnu chuan Australia lamah a pem a ni. Bawrhsap in (tuna Raj Bhavan) atanga Sikulpuikawn thleng hian a 'walk' thin a, an nupa khan an 'walk' a, kawng chung lamah kalin, Sikulpuikawn atangin kawng hnuai lam zawhin an haw leh thin a, alsatian ui lianpui hi an kai thin.

McDonald-a tluka bawrhsap ropui kha an awm lo ang. A personal clerk ka nih avangin engkim maiah, khaw chhu-ah te min ruai a, kan inzui nasa khawp mai.

Amah kha mi thinchhia chu ka ti ang a, amaherawhchu, a dawhthei a ni. A thin chu a chhia a, amaherawhchu, a duhzawngah chuan tihnuam tak a ni. Ka lakah phei chuan a thinrim ngai mang tlat lo. Fiamthu te pawh a duh. A staff-te welfare ngaihtuah tak a ni a. Zu in lo ka nih avang khan, eng emaw changa staff thenkhatin zu an nin chang pawhin a bawrhsap motor ngei khan an in thlengin min hruaitir thin. Zu in kha an awm na a, no khat emaw bak an in ngai lo.

Vawi khat chu, Pu MacDonald-a leh Capt. Penn (Lunglei SDO) awm dun laiin Pu Vandailova, head clerk-in ruai a theh a, 'va sawm rawh' mi tih angin bawrhsap leh mikhual SDO Captain Penn chu ka va sawm a. Bawrhsap chuan, "Vandailova hi, clerk te hi a tir a tir mai zel a," a ti a, ka haw leh a. Pu MacDonald-a khan ka va hruai tur min lo hlawhchhamtirna chhan kha, Pu Vandailova khan clerk thenkhat Pu Kapthianga (a hnua head clerk) te, Pu Sapbawia te a sawm kim loh avang khana lo kal mai duh lo hi a lo ni a. Pu Vandailova chuan, "Va kal leh rawh, ka sawm loh pawh ka sawm vek tawh e," a ti a. A pu Pu Pachhunga, mi hausa motor-in a lo han hruai chu a lo ni a. Tichuan, kim takin zu in mi tan zu, Hrangden zu, Chaltlang lalnu Pi Nguri um ngat an in ta a. Zu in ve lo ka nih avangin an vaiin Pu Pachhunga motor chuan chaw ei khamah ka thlah kual ta a ni. Zu in lo mi ka nih avangin dik tak chuan bawrhsap khan min duh khawp mai. Vawi khat pawh, a haw hnu khan lehkhabu lianpui "Queens Coronation" bu min rawn thawn a, a hmuhnawm kher mai. Tuin emaw min ruksak ta a ni ang. Queen Elizabeth lallukhum khum lai te a lang tam khawp mai.

Kan hmakhua turte kha a ngaihtuah a, saphovin min hawsan huna kan awm dan tur kha a ngaihtuah a ni. Saphovin an duh tak chu, MacDonald-a khan a bikin, tlang ram mite kha India sorkar hnuaia awm lova mahnia insorkartir an duh a. Chuvang chuan India politics hotute nen pawh khan an inrem vak lo. India hotu na na na chuan, Assam emaw India ramah emaw awm se min duh. Chutih laiin Burma-in indan an lo duh a, Burma chu an indang ta reng a ni. Pu MacDonald-a kha chuan 'independent' turin min duh. Tlang ram zawng zawng hi a hrangin awm se min ti.

Pu MacDonald-a kha Mizo Union kha a vengthawng nasa. Politics vangin an hel ang tih a hlau a ni.

Mizo tawng kha thiam tak a ni. Pu Pasena'n Mizo tawng kha a zirtir thin. An rama a hawnthlak khan Pu MacDonald-a chu West Scotland-ah roreltu, bawrhsap ang hi ka ti mai a, chutiang chuan an dah a. Chuta tang chuan lehkha Mizo tawng hlira a ziah hi min rawn thawn a, zawhna 12 hi a ziak a, a ziah hmasa ber chu "Who is Jesus Christ?" tih a ni. A dawt lehah chuan, "Mizo khuaah zingah nuin buh an la deng ngai em?" tih leh, "An buhden laiin pain khuma mu chungin, 'I chaw a so a, a liam a nia' an la ti thin em?" tih a ni.

A zawhna 12-te chu 'min rawn chhang ang che' a ti a, ka chhan pahin a fapa leh fanute tan ipte chei ka leisak ve a. Ka ipte thawn chu sikul kala lehkhabu ah nan an hmang tih min rawn hrilh leh a ni.

Saprama a haw hnu bawk khan Grindlays Bank-a draw turin cheng 2500 cheque min rawn thawn a, Grindlays Bank chu Shillong-ah chauh a awm a, ka zu zin theih loh avangin ka 'draw' ta lo a ni. Chuvang chuan cheque chu ka thawn let leh a.