International footballer a ni a, India ram football-ah mi lian a tling. Mahse lehkha a la zir a, peih lo chung pawhin a zir țhin. Tunah pawh, World Cup-a tel tur zawnnaa India team-a tel tura koh a ni a, exam a duh avangin a pha!

 

Lalengmawia Ralte, Apuia tia hriat lar a ni a, IGNOU-ah MA exam turin a inbuatsaih mek. India coach-in May ni 15-a Bubhaneswar-a thleng kim turin a team-a tel tura a thlante a hriattir a, Apuia chu a kal ve ta lo, thla leh hi exam hun a ni a, chu chu a thlang.

 

2018-ah professional footballer a ni țan a, mahse lehkha a la zir zel. Chhan hrang hrang vangin lehkha hi a zir a, "A bul chu ka nu hi a ni a," a ti. A nu hian zirna a ngaisang a, a fapa hi lehkha zir zel turin a duh a ni.

 

Pawl 10 a zir laiin Apuia hi India ram U-17 team-a tel tur zawnnaa trial nei tura tih a lo ni tawh a, mahse a nuin "Matric pass phawt rawh," a tih avangin a trial ve ta lo.

 

"Trial kha ka chak lutuk a, lo inkhelh ve țang țang chuan khatianga trial neih kha chak loh chi pawh a ni lo a," tiin a hun laia a rilru a sawi a, "Mahse ka nuin pawl 10 pass phawt turin min duh a, ka pa pawh a ni tho a," a ti.

 

Nu leh pa thu awihin pawl 10 exam a thlang ta zawk a, tun hnua a thlir let leh hian tifuh a inti, a nu thu a lo awih kha a lawm. 

 

"Trial an phal lo kha, lungawi lohna ka nei chuang lo a, ka ui a ni mai a. Ka ngaihtuah let hian nu leh pa thu ka lo awih kha ka lawm. An thu awih lovin lo trial ta ila ka inchhir ang, ka hlim ka ring lo. Nu leh pa malsawmna hi a lo awm a, an thu ka awih vangin malsawmna ka dawng," a ti.

 

"Nu leh pa thu hi awih tur. Kan nu leh pate aia min hmangaihtu hi an awm lo a, hlawhtling tura min duh tak taktu an ni," a ti bawk.

 

Vawiin thlengin a nu leh pa thu a la awih a, "Nu leh pa thu hi, phak ang tawk tawk chuan ka awih vein ka hria. Mihring kan ni a, han chak loh deuh chang te chu nei tho mah ila..." a ti a, "Bible-in nu leh pa thu awih tur a ti," a ti bawk.

 

Footballer ni chunga lehkha zir hi a hautak țhin tih a sawi a, hah hnepin an training a, an inkhel zo te hi an chau țhin tih sawiin, "Mut mai mai te a chakawm țhin a, mahse hah lai pawha zir a ngaih chang a awm a, chau chung chunga assignment tih a ngaih chang te a awm a, tum chu a ngai ve țhin khawp mai," a ti.

 

Footballer a nih hma pawhin lehkha zir nuam ti mi a ni lo tih a sawi a, "Naupan lai ațangin lehkha zir nuam ti chi ka ni lo," tiin, chuti chung chuan lehkha a la zir zel thu a sawi a, "Dik taka sawi chuan lehkha zir lo hian kan awm thei a, hna zawn nan kan hmang dawn lo a, kan kalna line-ah hian ninawm pawh a tling ve tho. Mahse zir zel hi ka duh a ni," a ti.

 

A zir zel hi tifuh a inti a, "Duhthlanna atan te hian a lo pawimawh a, lehkha zir miah lo ai chuan lehkha zir chuan duh an thlang thiam ang," a ti. "Thil thlir dan a lo dik sawt a, mi biak dan te kan thiam phah a, mi bula awm dan te kan thiam phah ve a. Bakah thluak kan sawizawi tihna a ni a, hei hi inkhelhnaah pawh a țangkai a, thluak sawizawi hi thil pawimawh a ni a, inkhelhnaah thleng hian lehkhazir hi a țangkai," tiin zirna a țangkaipui thu a sawi.

 

Nu leh pa thu awihin lehkha a zir zel a, tuna India team-a tel tura an koh pawhin, exam a duh zawk vangin a pha. Coach-in mak a ti a, 'Inngaihtuah țha leh rawh,' a tih pawhin a rilru a sawhsawn lo. 'Inkhelh i tum tawh lo em ni?' a ti hial!

 

"Inkhelh ka ngai pawimawh lo a ni lo a, exam nen a inrual tlat a, inkhelh te chu a la awm zel dawn a, exam ngaih pawimawh zawk a ngaih hun a awm ve ni maiah ka ngai," Apuia chuan a ti a, India team zawm lo tura thu a tihtluk dawn hian a nu leh pa a rawn thu sawiin, "Ka rawn a, țha an lo ti a," a ti.

 

Footballer ni chunga lehkha zir a hautak thu a sawi rual hian thil theih a nih thu leh a hautak lohna lai pawh a awm thu a sawi a, "Kan inkhel reng lo a, kan buai reng bik lo. Zirna hun hi chu a awm. Phone khawih mai mai aiin lehkha kan zir tihna te pawh a ni ve tho," a ti.

 

Apuia hian Bible a chhiar țhin a, vawi thum a chhiar chhuak tawh. Youtube-ah lehkhabu chhiar leh mi thusawi a ngaithla țhin bawk.

 

U-17 leh U-23-ahte India ram ai a lo awh tawh a, senior level-ah international match vawi 18 a khel tawh bawk. NE United-a a khelh laiin ISL-ah captain naupang ber te pawh a lo ni tawh. Chutianga inkhel chung chuan lehkha a la zir zel - a nu thu awihin.